Adeus, a lectura declamada do coñecido poema de Rosalía de Castro, Adiós ríos, adiós fontes, gañou o I Concurso de Podcasts Lingüísticoartísticos convocado pola Asociación Socio-Pedagóxica Galega na categoría de Poema. O traballo presentouno o rapaz Anxo Rodríguez Lemos, do IES Primeiro de Marzo, que ambientou a súa lectura co Adagio de Samuel Barber e diversos sons da natureza de fondo. Podedes baixalo aquí (3,47 Mb).
O xurado, composto por D. Antón Álvarez, Dª. Anxa González Refoxo, D. Xoán Carlos Rábade, D. Eduardo Álvarez González e Dª. Mª Xesús Freire (secretaria), acordou que os demais premios para as outras categorías (Conto e Libre) ficasen desertos.
Aproveitamos a ocasión para facer público, e engadir no noso directorio, o Podcast Educativo lanzado pola AS-PG a finais de outubro do pasado 2007. O podcast ábrese en cinco canais distintos: Arquitectura, Ciencias e Natureza, Lingua, Persoeiros e Pintura. Deste xeito, pode un agregarse ao canal que máis lle preste e prescindir dos outros, aínda que podería estar ben ter un rss onde poder subscribirse a todos dunha tacada.
Tamén habilitaron o que chaman unha Podoteca, un recuncho útil onde saber máis cousas sobre temas de podcasting, e ligazóns de interese para os que queiran saber do asunto.

+ info:
http://www.as-pg.com/
http://www.as-pg.com/Podcast/
http://www.as-pg.com/ViewNewness.do?newne...
http://www.as-pg.com/Podcast/MoreInfoCont...

O directorio Podsonoro.com, posibelmente un dos máis útiles e que mellor traballa, e moi xeitoso para descubrir novos podcastes en castelán, acaba de renovar hai un par de días o seu aspecto visual e algunha cousiña máis do seu funcionamento interno, renovando de paso o logo e tirando a etiqueta de beta.
O seu administrador, Carlos Fernández, a quen tivemos o moi grato pracer de coñecer en Barcelona nas II Xornadas de Podcasting, conta no seu vloj cales son estas novidades. Di que xa levaba tempo con ese cambio pendente cara un look máis ao rede social, e algúns dos cambios son: un novo reprodutor flash, para escoitar os episodios dos podcasts, máis largo e menos alto, ocupando menos espazo; tamén fixo máis larga a páxina (980 px); gardou o historial dos top, que non se amosa mais, se cadra, nun futuro, di, fará algún gráfico usando o google Chart API; e outras das cousas que modificou foi o tema dos comentarios, nos últimos tempos inzados de fanáticos olalleiros maleducados e bastante molestos. Agora, cando non estás logueado só se pode facer un comentario cada 10 minutos, e non podes loguearte con outro nombre de usuario. E o sistema de destacar podcastes en cada categoría, que antes facía a dedo faise agora por medio dun complexo algoritmo baseado no Kernel do VIC-20, tendo en conta o que a xente escoita na web, etc., é dicir, máis 2.0.
Os nosos parabéns para Carlos!
+info:
http://www.podsonoro.com/ (castelán)
http://www.vloj.com/archives/102 (castelán)

O servizo de balde para aloxar blogues, WordPress.com, decidiu que agora as contas dispoñan, de balde, de até 3 Gb de espazo, cousa que abre a posibilidade de, coa axuda do Podpress, hospedar alí un podcast durante unha boa tempada. A que soa gorentoso? Non permiten aínda subir arquivos de video e non serve para facer un videocast, mais se isto ten éxito, non desbotamos que chegue acontecer, non?. Ah, e se tiñas xa pagada unha ampliación a 1 Gb. de espazo dos 50 Mb. que ofertaban antes de balde, agora danche até 5 Gb!
+ info:
http://mmagnum.wordpress.com/2008/01/23/w... (castelán)
http://unpocodemucho.wordpress.com/2008/0... (castelán)
http://wordpress.com/blog/2008/01/21/thre... (inglés)