Recibimos no noso correo unha nota de prensa de Rádio FilispiM anunciando a nova tempada e facendo un chamado aos que queiran enviar propostas de programas. Aquí deixamos a nota enteira:

Nota de prensa do Colectivo Opaíí! - Rádio FilispiM.
Ferrol, 10 de setembro de 2009

Comeza a quinta tempada de Rádio FilispiM, 93.9 FM. a rádio livre e comunitária da Terra de Trasancos

O quinto curso radiofónico, 2009/2010, da radio libre e comunitaria da Terra de Trasancos está a piques de comezar. A nova programación comezará a emitirse oficialmente o xoves 1 de outubro de 2009. Rádio FilispiM é unha radio sen ánimo de lucro integrada no terceiro sector da comunicación: o da cidadanía.

PRESENTACIÓN DE PROPOSTAS.
Para poder realizar o teu programas debes enviar a túa proposta antes do sábado 19 de setembro a filispina@gmail.com.
Se xa es membro do colectivo Opaíí!-Rádio FilispiM, lembra que debes ter as cotas ao día, requirimento indispensabel para darlle continuidade a túa proposta radiofónica.

SESIÓN VERMÚ.
Por outra banda o sábado 31 de outubro haberá unha sesión vermú presentación da nova grella, no Ateneo Ferrolán. En breve darémoste máis información desta festa.

VINDEIRA ASEMBLEA.
Por outra banda, a vindeira asemblea preparatoria da tempada de Rádio FilispiM, será o sábado 19 de setembro no Ateneo Ferrolán, coincidindo co fin de prazo de presentación de propostas radiofónicas e aboo de cotas pendentes.

EN REDE.
Este novo curso radiofónico, o colectivo re-editará a colaboración con outras radio de Galiza, Estado e resto do mundo, ao través da difusión de propostas coma Nosotras en el mundo, Crestas e Imperdibles, Moito de Aquí, Commons Baby, Mapamundi, o informativo Más Voces ou Marca Branca, entre outros moitos espazos de radios irmás de todo o mundo.

Destacar o intercambio de programas que Rádio FilispiM da Terra de Trasancos e Rádio Piratona de Vigo comezaron a pasada grella, abrindo un camiño recollido no ideario da REGARLIC, Rede Galega de Radios Libres e Comunitarias, da que Rádio FilispiM e membra xunto a Radio Kalimera de Compostela, Radio Clavi de Lugo, Cuac FM de A Coruña, Radio Roncudo de Corme e Radio Piratona de Vigo.

Participa!!!!!

Nas últimas semanas apareceron novos falangullos galegos. Dos xurdidos no curso do Consello da Xuventude xa falamos aquí, mas hai un par deles novos, e ámbolos dous teñen vencello con radios locais, posibilitando por medio do podcasting traspasar fronteiras e espallar as voces a calquera recuncho do mundo (con conexión a rede, claro).

Tecnívoros

É, que nós teñamos constancia, o primeiro podcast en galego sobre informática e tecnoloxía, non era sen tempo; e naceu dun pequeno apartado sobre novas tecnoloxías no programa Entre Nós, de Radio Lalín. Oxalá se animen a facer un spin-off e facelo máis de seu e algo máis longo, pois dez minutiños saben a pouco.

O Recuncho

Novo espazo radiofónico na Ràdio FilispiM focado en temas sociais e culturais que afectan ás mulleres e homes da Ferrolterra.

E falando de Rádio FilispiM, tamén vos comentamos que C'mmons baby! (un podcast sobre músicas publicadas baixo licenzas abertas) comezou emitir polas ondas desta emisora desde hai un par de semanas.
Benvida a interacción entre medios, a ver se isto axuda a que as outras radios libres galegas aproveiten a tecnoloxía do podcasting para agrandar a súa difusión e ser aínda máis libres.

A el dálle aquel que o digamos, pero o noso compañeiro Sak, pioneiro no podcasting en galego co seu magnífico e, mágoa, desaparecido e-music (a ver se un día fai algo para subilo á rede outra vez), pasou de ter un falangullo a ser o flamante presentador e director de Radio Oceánica, en Radio Galega Música, recollendo o testemuño de Noel Feáns, anterior director do programa.
Sak comenzou con isto aló polo ano 2002, na Cuac FM; tempo despois cando, no 2004, buscaba o xeito de facer radio en liña na internet, deu co tema do podcasting, e aló que foi convencido de que o sistema tiña futuro. Nun principio, creaba os rss código en man, o valente; e foi así que o seu e-music, vía podcast, comezou medrar en popularide entre os internautas galegos. O seu bo facer e a súa voz, persoal e cálida, facianos crer, e desexar a moitos, que o seu sitio estaba nunha emisora de radio grande, e eis que agora o temos na Radio Galega. E ben cheos e orgullosos que estamos!
E como a cabra tira ao monte, vai retomar a publicación de Radio Oceánica en formato podcast, que estaba parada desde o mes de xullo pasado, o cal nos vén ben aos despistados que esquencemos que todos os domingos temos cita con el a iso das 22:00 h.
E ademais é bo rapaz!

A emisora arxentina FM La Tribu fai un chamado a bandas e solistas de todo o mundo para participar nun compilado de apoio aos traballadores do subterráneo de Bos Aires.
A temática do disco vai ser O Traballo, e o lema: Música desobediente para que el trabajo deje de ser explotación y se transforme en creación colectiva. Música libre para nunca más convertir su belleza en pura mercancía. Piquetes sonoros. Huelgas acústicas. Marchas eléctricas. Reclamos a coro.
As canciones poden ser de calquera xénero musical, extensión e idioma, e deberán ser orixinais e publicadas baixo algunha destas licencias Creative Commons: BY-NC-ND, BY-NC-SA o BY-SA. Queren editar 1.000 unidades que van distribuír de balde en distintos puntos da cidade de Bos Aires, e tamén se poderá descargar libremente. O disco presentaríase en marzo de 2008 e cada banda escollida tería 20 exemplares para eles.
Hai tempo até o 1 de decembro para achegar a música, por e-mail a discosubte@gmail.com, en persoa ou por correo a FM La Tribu, Lambaré 873- C1185ABA.
+ info: na web da emisora.
vía: Zona Indie

Pois si, parece que desde decembro de 2006 Radio Nacional de España (Rne) comezou fornecer en formato podcast algúns dos programas sobranceiros da canle nacional, e nós sen sabelo! Das distintas canles que Rne rexe poden sindicarse contidos de REE (Radio Exterior de España), Radio 1, Radio 3 e Radio 5 (non sabemos porque non de Radio Clásica).
Agora, para ser verdadeiramente modernos, xa só lles falta que renoven radicalmente e dunha vez a, desde hai ben anos, penosa e pouco usábel web da Radio 3, da que, a propósito, só hai disposta sindicación para 4 programas; e un deles o supostamente máis de vangarda, Siglo 21, aínda non traballa, ou polo menos non ten nada subido (por non ter, non ten nin web) e xa levan case un ano co servizo.
+ info: Portal dos podcasts de Rne.